Pirritx, Porrotx eta Marimototsek beren ikuskizun berria, Txo MikMak txikia izenekoa, eskainiko dute larunbat honetan Leidorren. Bi saio izango dira: 16:00etan eta 19:00etan. Gaur bertan jarri dituzte sarrerak salgai, Leidorreko leihatilan eta Kutxabank-en sarreren webgunean.
Ez dira, ordea, saio arruntak izango. Pailazoek argitaratuko duten hurrengo DVDa bertan grabatuko dute, eta saioa ikusgarriago egite aldera, mozorrotuta joateko deia egin dute. Mozorrotu beharreko gaia Itsasoa izango da.
Festa giroa borobiltzeko, Bonberenea Txarangak ikuskizuna hasi bitartean sarrera alaituko du, eta Kazkabarra aisialdi taldeko kideak ere bertan izango dira.