Neurketa oso gogorra izan zen, eta ordu bat eta 55 minuturen ondoren, azken set-ean erabaki zen. Berdinduta iritsi ziren azken txanpara, eta Tie-break delakoa jokatu behar izan zuten berdintasun hori puskatzeko. 9-6ko abantaila lortu zuten hasiera batean, baina txekiarrek aurretik jartzea lortu zuten, 9-10. Dena den, lanean jarraitu eta 11-11ko berdinketaren ondoren 13-11ko emaitzarekin txapelketa irabaztea lortu zuten.
"Oso partida interesgarria izan da, laurak ongi jokatu baitugu eta edonork zuelako irabazteko aukera. Suertea gure alde izan dugu zorionez" aitortu zuen tolosarrak neurketa amaitu ostean. Partida, berriz, "lasai" bizitu zuela esan zuen: "ez genuen presiorik, beraiek ziren faboritoak".
12.300 dolarreko diru saria eta binakako sailkapenean 280 puntu jaso dituzte Torrok eta Arruabarrenak. Acapulcokoarekin, Arruabarrenak WTA zirkuituko binakako laugarren txapelketa irabazi du, aurrez Katowicen eta Bogotan birritan gailendu eta gero.
Monterreyn porrota
Lara Arruabarrenak Mexikon jokatzen jarraitzen du. Asteburuan Acapulcon jokatu ondoren, Monterreyko txapelketako lehen fasea jokatu berri du, Paula Ormaechea argentinarraren aurka, eta porrota jaso du 6-2 eta 6-4. Datozen asteotan, Indian Wells y Miamiko txapelketak jokatuko ditu tolosarrak.
