2015ak ere informatikazaleei txokoa egingo die Tolosan, Gipuzkoa Encounter topaketarekin. Urtez urteko markak hautsiz, aurten 41 segundotan bete dira martxoaren 13tik 15erako leku guztiak; horrela, 400 ordenagailu bertaratzeko aukera izango dute, 600 informatikazale inguruk.
Errekorra marka da gero, izan ere, iaz minutu eta 27 segundo behar izan zituzten, zaleek, Usabalgo eserleku guztiak erreserbatzeko. Atzera eginez, berriz, 2011n hiru ordutan bete ziren tokiak eta, 2012an, 12 minutuan; 2013an, berriz, 2 minutu eta 20 segundoan bukatu ziren encounterrean parte hartzeko txartelak.
Datorren martxokoarekin, bederatzigarren Gipuzkoa Encounterra izango da aurtengoa, eta arte digitaleko, hardwareko eta software libreko lehiaketak egingo dituzte, besteak beste; halaber, sareko jokoez nahiz hitzaldiez gozatzeko aukera izango da.
Aurreko jaialdietan bezalaxe, Tolosako Udalak eta Euskaltel Fundazioak antolatuko dute egitasmoa, eta Gipuzkoako Foru Aldundiaren nahiz Eusko Jaurlaritzaren babesa ere jasoko dute.