Ostegun Gizeneko, Zaldunitako, Astelenitako eta Asteartitako zezen ikuskizunetara joateko irrikaz daude tolosarrak. Hala erakutsi dute, behinik behin, interneteko salmentaren harrerak eta gaur goizean goizetik Leidor atarian sortzen joan den ilarak.
Bizkorrenak 08:00etan ilaran jarriak ziren jada, eta txandak eginez, zezenak ikusi eta txarangaren doinura dantzatzeko aukera ziurtatu nahi izan dute. Hotzari eta orduen errenkadari aurre egiteko aulkitxo nahiz besaulkirik erosoena ilarara eraman duenik ere izan da, eta norbere denbora-pasak aukeratu dituzte, herritarrek, 16:00etan leihatila zabaldu bitarte.
Gogora ekartzekoa da, sarreren erdiak internet bidez salgai jarri zituela udalak, eta egun bakarrean amaitu zirela. Arratsaldean, berriz, gainerakoak eskuragarri izango dira eta, ilara azkartzeko helburuz, sei salmenta puntu jarriko ditu udalak.