"Lan bilera bat baliatuz", Denis Itxaso Gipuzkoako Aldun Nagusi izateko PSE-EEren hautagaia Tolosako egoitzara bertaratu da aste honetan. Besteak beste, Bilduk Tolosaldean hondakinekin hartu duen jarrera kritikatu zuen agerraldian, "EH Bilduren joera naturala gauzak inposatzea dela" nabarmenduz.
Datorren maiatzeko hauteskundeei begira, sozialistek ere hasia dute herri-eragileekin biltzeko erronda. Horrela, Asensio zinegotziak "proposamen asko" jaso dituztela azaldu zuen asteazkenean, langabeziaren arazoa konpontzea lehentasun gisa zehaztuz: "Denis Itxasori horixe eskatuko diogu, lehentasun moduan, aldun nagusi izendatzen dutenean".
Bide beretik, Asensio alkategaiak azken legealdiko erakundeen arteko elkarlana "hutsala" izan dela salatu zuen, EH Bildu eta EAJ seinalatuz: "Tolosan legealdi honetan aurrera eraman dituzten egitasmo nagusiak –Euskal Herria plazako gazteentzako etxebizitzak, Lehiberri edo Topic– Iñaki Arriola Eusko Jaurlaritzako kontseilari zen garaian onartu ziren; eta, kasualitatez, baita Espainiako Gobernuan PSOE gobernatzen ari zenean".
Horren harira, bera, bai Bilduk eta bai EAJk "krisia aitzakiatzat" darabiltela uste du PSE-EEK: "Krisia ez da aitzakia proposamenik ez egiteko eta, EAJri dagokionez, ez da zilegi beraiek aginteak ez daudenean, tolosarrak zigortzea".
Itxasok, San Marcos adibide
Denis Itxasok hondakinen gaiari heldu nahi izan zion agerraldian, hiritarren "desadostasun garbia" azpimarratuz: "Badirudi Bilduk ez duena onartzen, atez atekoa jarri ez arren, ohiko edukiontziak direla onenak".
Bere arabera, "Tolosako etxeak benetako biltegi bilakatu dira azken hilabeteotan" eta, gainera, "Donostiako datuak atez ateko herrietakoak bezain onak" direla dio. Finean, "eskualdeak ezin du laborategi bat izan" Itxasoren ustez, eta "politikari zentzudunak behar dira".