Auzoko jaiak asteburuan hasi baziren ere, igandearekin batera, San Blas eguna bera izaten da herritar gehien biltzen dituen eguna. Emendek elkarteak prestaturiko erromeri, joko nahiz tabernarekin batera, otsailaren 3ko meza nagusiak ere herritar asko bertaratzen du Tolosako baselizarik zaharrenera, tradizio zaharrenei eutsiz.
Izan ere, San Blas eguna osasun onaren alde eta eztarriko minen aurka jakiak bedeinkatzeko eguna da. Lepoan lokarria lotuta eusten diote sinesteari, zenbaitek, baina, Tolosan, San Blas opilak, azukrea, lentejak, babarrunak, garbantzuak nahiz gozokiak eramaten dituzte herritarrek, minak uxatzeko.
Gaur ere halaxe gertatu da eta, eguna elurtuta hasi bada ere, tolosarrek ez dute zalantzarik izan, San Blaseko tontortxoa igotzeko. Baseliza bete egin da eta, eguerdia gerturatzen zihoan heinean, eliza atarira ere herritar gehiago bertaratu dira. Jakiak bedeinkatzera joan dira batzuk, eta San Blas opilez nahiz barrako txistorraz gozatzera, beste asko, hamaiketakoa eginez.
Horrela, aurtengo San Blas jaiak gaur biribilduko dituzte, 18:30etik aurrera, Malbadi anaien trikiti saioarekin.