Mendi-Tour zine zikloaren egitarauaren baitan, film laburren lehiaketa antolatu zuen udalak. Bost lan jaso dituzte aurten, eta Iosu Iztueta bidaiariak, Pablo Dendaluze ekoizleak, Edurne Pasaban alpinistak, Ramon Olasagasti kazetariak eta Nagore Salaberria bidaia gidariak osatutako epaimahaiak Mikel Sarasolaren lana hautatu du.
Epaimahaiak bere balorazioan azaldu duenez, "tituluak berak laburtzen du egokien film laburrak barnean biltzen duena: piraguarekin uraren gainean bizi, goza eta egin daitezkeen jarduera, abentura eta bidaia askotarikoen irudien bilduma". Azken finean, "filma piraguaren aldeko aldarria" dela adierazi dute.
Martxoan ospatuko da Mendi Tour jaialdia, eta bertan izango da ikusgai, lehiaketara aurkeztu diren gainontzeko film laburrekin batera.