Prentsa ohar baten bidez bilketa sistema berriaren balorazio propioa egin dute Tolosako PSE-EEko kideek, Jose Ignacio Asensio alkategaiaren izenean. Besteak beste, "hasieratik gaizki funtzionatu duen sistema" izan dela azpimarratu du, eta "edukiontzien neurria, hondakin organikoarentzat, txikiegia" dela: "Bideetan eta eremu berdeetan poltsak agertzen dira, horren ondorioz".
Bide horretan, Eguberrietako ospakizunen ondorenak hizpide izan ditu Asensiok, egoera "larritu" egin dela azalduz: "Erronka garrantzitsua izan da porrot hutsa den sistema honentzat".
Horrenbestez, beraz, eta, "zentzuz jokatzea eskatuz", Jose Ignacio Asensiok hautazko bosgarren edukiontzia aldarrikatu du, Eibar adibidetzat jarriz: "Eibarko gobernu sozialistak hautazko bosgarren edukiontzia ezarri du, horren aldeko apustua egin duten herritarrei hobari fiskalak ezarriz, eta eibartarren %90 jada sistema horrekin ari da".
Horren harira, "Bilduk kalbario bat sortu" duela nabarmenduz, "inposatzearen gainetik kontzientziazioa" jarri du Asensiok, eta "errespetu falta" egotzi dio udal gobernuari: "Kalitate demokratiko hori baliogabea da".