Bedaioko Artubi elkarteak Badihardugu euskara elkartearekin sinatutako hitzarmena medio Bedaioko ahozko ondarea eta herri hizkera bildu eta hedatu egingo da. Artubi elkarteak baikortasunez hitz egin du lankidetza honetaz: «Beste pauso txiki bat da gure kultura jaso eta gordetzeko ibilbidean».
Artubi eta Badihardugu elkarteen arteko hitzarmena posible egitea elkarte biek helburu komunak izatean erroturik dago. Horrela, azpimarratu dute behinik behin Bedaioko elkartearen partetik: «egitasmoak antzekoak direla kontuan hartuta, elkarri laguntza emateko eta indarrak optimizatzeko, elkarlanerako hitzarmena sinatu dugu».
Finean, Badihardugu euskara elkarteak, Bedaioko herritarren laguntzarekin batera, aurrerantzean egin beharreko lanak ondorengoak izango dira: Bedaioko adineko jendea elkarrizketatzea, euren euskara eta bizipenak jasotzea eta herritarren artean zabaltzea.
Bedaion aurrera eramango den ekimena aurretik Euskal Herriko hainbat eta hainbat txokotan martxan jarri da, Ahotsak proiektuari esker: Euskal Herriko hizkerak eta ahozko ondarea. Honela, Ahotsak proiektuak adineko jendea elkarrizketatuz audio zein bideo materiala bildu egiten du eta material hau egokitu ondoren, www.ahotsak.com webgunean jasota gelditzen da.
Aurrerantzean beraz, webgune honetan Bedaioko adinekoen ahotsak topatu ahal izango ditu herritar orok.