Goizean, Apatta industrialdean izan dira hainbat enpresa bisitatzen, tartean Voith. Ondoren, Uzturre asistentzia zentroan izan dira, hirugarren adinekoekin. Bazkal aurretik, Topic-eko erakusketa berria bisitatu dute Elena Basagoitia zuzendariaren eskutik.
Olanorekin batera, Olatz Peon alkategaia, Jokin Azkue eta Nerea Letamendia zinegotziak; Patxi Amantegi, Tolosa Txukuneko bozeramailea; Juanra Bastarrika, EAJko juntako presidentea; Eider Mendoza, Batzar Nagusietako lehendari ordea eta EAJko Batzar Nagusietako Gizarte politiken arduraduna izan dira bisita guztian zehar.
Eibarren hasi ondoren, Gipuzkoan zehar egin duen bigarren bisita izan da gaurkoa Olanorentzat, eta Tolosa herri "bizia" eta kulturalki "oso indartsua" dela azpimarratu du. Alor ekonomikoan, ordea, bisitatutako bi enpresetatik bi ondorio nagusi atera ditu: "Enpresetan, alde batetik, egoera txukuna zela eta lana bazegoela ikusten zen; baina bestalde, bailarako enpresen azterketa egitean, ez ziren baikorrak. Tolosan enpresen egoera oro har ez da ona. Proiektu berriak bultzatu behar dira, eta hori behar du Tolosak. Lurraldeko erakundeek hartu behar dute sare ekonomikoa bultzatzearen ardura".
Peonek, bestalde, eragileen artean "errealitate konpartitu bat" osatzeko beharra azpimarratu du. Ekonomikoki, azaldu du "Tolosaren erronka nagusia garapen ekonomikoa" dela, eta horren barruan, "enpleguaren sustapena". Horri lotuta, "eremu publikoan ekintzailetasuna" aldarrikatu du: "Etorkizuneko proiektu berriak behar ditu Tolosak". Horretarako bidean lanean hasi direla esan du Peonek, "zuzeneko komunikazioa bultzatuz: telefonoa hartu eta bilduz".
Photokafen bakaldu ostean, Tolosa&Co merkatari elkartearekin bildu dira. Ondoren, Tolosaldea Txukun plataformako kideekin bildu dira. Zizurkil, Amasa-Villabona eta Anoetako herritarrak ere izan dira batzar horretan, eta bertan, bostgarren edukiontzia aldarrikatu dute. Kirol instalazioak bisitatu dituzte ondoren, eta bisitarekin amaitzeko, pintxo-potean izango dira.