Azken asteetan Tolosako plaza eta kaleetan txorimalo berezi batzuk agertu dira. Lehenik, Tolosako Trianguloa plazan agertu ziren kartel handi batekin, baina, orduz gero Tolosako gune ezberdinetan ikusi ahal izan dira txorimalo ezberdinak, mezu ugarirekin, esate baterako: «Zergatik ematen diogu bizkarra elkarri?». Twitter bidez txorimaloek eurek zabaldutako bideo batean azaldu dutenez, txorimalo horiek Tolosako «gazteriarekin» lotuta daude eta azaldu dutenez larunbat honetan «txorimaloen eguna» ospatuko dute, hau da, Tolosako gazteriaren eguna.
Egun osorako egitarau zabala prestatu dute. 09:00etan graffitien erakustaldiarekin hasiko dira eta gaueko kontzertuak arte ekimen ugari izango dira. Aipatu, bazkarirako txartelak eta futbito txapelketarako eta mus txapelketarako izen ematea Denak eta The Nest tabernetan egongo direla. Bazkarirako txartelak 5 eurotan daude, eta paella eta sagardoa eskainiko dute. Afarirako, berriz, sagiardoa prestatu dute. Bertan bokatak egongo dira salgai 3,5 eurotan eta antolatzaileek sagardoa jarriko dute.
Gazte eguna
URRIAK 18, LARUNBATA
09:00. Graffiti erakustaldia, Trianguloa plazan arratsaldera arte..
10:00. Karpan, bideo emanaldia: Piparmin.
10:30. Hamaiketakoa, karpan.
11:00. Kortxoenea hitzaldia, karpan.
11:10. Futbito txapelketa, Parke Jurasikoan.
14:00. Bazkaria karpan.
15:30. Mus txapelketa, karpan.
16:00. Gazte jokuak, Paza Berrian.
16:30. Arte martzial erakustaldia, Beotibar frontoian.
17:00. Marihuana tertulia, karpan.
17:00. Break Dance, Trianguloan.
18:00. Kalejira, Berdura Plazan, Udaberri dantza taldearen eskutik.
19:30. Batukada, Trianguloan.
21:00. Afaria, Sagiardoa, karpan.
23:00. Kontzertuak karpan: Ahuntzape, Ingo al deu? eta Revolutionary Brothers.