Gaur estreinatu dute Donostiako Zinemaldian Lasa eta Zabala filma. Jende andana bildu da Victoria Eugenia antzokian Pablo Maloren filma ikusteko. Han ziren, besteak beste, Joxi eta Joxanen paperak egin dituzten Cristian Merchan eta Jon Anza aktoreak; Jose Ramon Soroiz aktorea eta Arkaitz Cano idazlea.
Ikusleek txalo zaparrada eskaini dute filmaren amaieran, eta gehienek filmaren "gogortasuna" aipatu arren, barreak ere izan dira, Enrique Rodriguez Galindo guardia zibila azaltzen zen zenbait eszenatan, hark esandakoak karikatura bat bihurtuta.
"Izugarrikeria bat jasan zutenen ondoan jarri naiz"
Guardia Zibileko kideak karikaturizatuak ez ote dauden galdetu diote zuzendariari, eta ezeztatu egin du Malok: "Ikerketa abiatu genuenean, konturatu ginen benetan segituz gero errealitateari, orduan bai geldituko zirela karikaturizatuak. Egia askoz muturrekoagoa zen".
Joxe Portela filmaren ekoizlea ere gustura agertu da egindako lanarekin. "Senideei eta gainontzeko protagonistei gustatu zaie". Baina filma egiteko izan dituen zailtasunak nabarmendu nahi izan ditu Berriak eta Hamaika telebistak elkarlanean egiten duten Zurriolako Butaka saioan. Gainera, laguntza publikoen inguruan izandako polemiken harira gogorarazi du Gipuzkoako Foru Aldundiaren laguntza aurrekontuaren %4a baino ez dela izan.