Arratsaldean zabaldu ditu ateak Tolosako XVI. Garagardo Festak. Igarondo Urpekoak, Tolosaldea Igeriketa Taldea, Judo Taldea eta Tolosa CFko nesken txirrindulari taldea ibili dira festa honen antolaketan, eta jadanik, lehen garagardoak zerbitzatu dituzte.
Igandera bitarte 30 garagardo ezberdin dastatu ahal izango dira Tolosako Zerkausian: 11 horiak izango dira; sei tostatuak; gariarekin egindako zazpi izango dira; lau beltz; alkohol gabeko bat; eta zeliakoentzako beste bat. Jateko ere urteroko eskaintza izango da. Ukondoa da plater arrakatatsuenetako bat. Agustin Pagola antolatzailearen esanetan, "Donostiatik ere etortzen dira Tolosako ukondoa jatera".
Bi berrikuntza
Aurten, bi nobedade izango dira azokari dagokionez. Alde batetik, zenbaki bidezko zerbitzu sistema abiaraziko dute, itxaronaldiak ekidin eta zerbitzua azkartze eta hobetze aldera. Bestalde, erosten den garagardo pitxar bakoitzeko 0,50€ Sanfilippo Fundazioari emango zaizkio.
