Joxe Mari Beldarraini otu zitzaion ideia: "Eibarrek egin duena lorpen oso handia da, eta kapitaina tolosarra eta laguna izanda, hori ospatzeko modu ona iruditu zitzaigun" esan du. Tzotzoloak kuadrillako kidea da 'Belda', eta lehen maila gogorra dela kontziente izanik, Arruabarrena "gehiago motibatzea" bilatu dute egitasmo honen bitartez.
Uzturreko magalean, Bizkaietxe baserrian hezitako txekorren txuletak dira Arruabarrenari emango dizkiotenak, "bakoitza 800 gramo ingurukoa, parrillan egiteko aproposak", Joseba Barriola harakinak azaldu duenez.
Dagoeneko lehen hiru txuletak banatu dizkiote, eta futbolariak adierazi duenez, "kuadrilla izango da dastatzen lehena. Ostiralero biltzen gara elkartean, eta eurekin afalduko ditut".
Zenbat gol sartuko ote dituen galdetuta, azkar bota dute zenbaki bat Beldarrainek eta Barriolak. Lehenak, "dozena erdi bat" sartuko dituela dio, eta besteak, berriz, bost. "Galtzea espero dut. Ea 10 izaten diren amaieran. Behar adina txuleta emango dizkiogu". Futbolaria, aldiz, "anbizio handikoa" izan arren, tentuz jokatzearen aldekoa da: "Zaila da lehen maila, kosta egingo da partidak ateratzea. Sei gol zifra polita da, baina zaila izango da".
Eta golak sartzekotan nori? "Denak izango dira ongietorriak, baina batik bat euskal taldeei, ondoren jendea pikatzeko, eta Barça eta Real Madril bezalako talde handiei sartzeak ere ilusio berezia pizten dit".
Bien bitartean, golak sartzeko zain egon beharko du Arruabarrenak. Aurredenboraldia uztailaren 14an hasiko dute, astebete barru, eta erronka berri honen aurrean gogotsu da: "Ilusio berria da, disfrutatzeko denboraldi bat. Agian gero luzea egingo da, baina orain talde osoa denboraldia hasteko gogoz dago".