Tolosako Udalak bazituen, lehendik ere, buruhandi eta erraldoi propioak. Guztiak ere zaharkituta daudela ikusita, ordea, lau buruhandi berri egitea erabaki du udalak, artelana Iñaki Moyuaren esku utziz.
Horrela, euskal mitologiako pertsonaiak gogora ekarri nahi izan dituzte jai-giroko korrika saioei kolorea jartzeko eta, bide beretik, parekidetasuna ere irizpidetzat hartu dute. Horrenbestez, Galtzagorri, Sorgin, Ilargi eta Iratxo izenez ezagutarazi dituzte lau buruhandiak.
Datozen hilabeteotan plazaz plaza ibiliko dira haur eta gaztetxoek atzetik, eta gaur bertan izango dute estreinaldia, Amarozko jaien abiaraztean.