Pasa den ekainaren 14an EAJk Donostian egindako aurkezpenean jada ezagutarazi zuten moduan, Olatz Peon izango da Tolosako EAJk 2015eko maiatzeko udal hauteskundeetan aurkeztuko duen alkategaia. Hiriburutik herrira ekarri nahi izan dute hautagaiaren plazaratzea, eta Olatz Peonek aurkeztuko duten programa politikoa zirriborratu du, lantaldearen indarra azpimarratuz.
45 urte ditu eta gizarte langilea da ikasketaz. Tolosako Udalean zortzi urtez izan zen zinegotzia, Jokin Bildarratz alkate zela eta, legealdi honekin, 12 urte beteko ditu udalean, oposizioan. Alderdiaren egitasmoa "baloreetan" oinarrituko dutela azpimarratudu Peonek: "Irekitasuna, etika, eraginkortasuna eta autokritika ezinbestekoak izango dira etorkizuna eraikitzeko".
Horrela, ekonomia, gizarte politikak, gobernu on eta eraginkorra eta herriarekiko maitasuna zutabe izango dituztela azaldu du hautagaiak: "Zeharka, berriz, generoa, euskara nahiz kultura bezalako gaiak jorratuko ditugu. Modu holistikoan lantzen ari gara proposamena, departamendu zehatzetan gelditu gabe". Alderdia jada programa politikoa herritarrekin lantzen ari da, eta urria inguruan aurkeztuko dute.