Helburuen artean, San Esteban auzoa txukuntzea eta egokitzea dute. Eta honekin, mugimendua bermatu nahi dute San Estebanen. Auzotik jendea Tolosa erdira zuzendu nahi dute. Tolosako Merkataritza Sustatzeko plan integralean jasotako ekimena dela ekarri du gogora Iriartek: «Merkatarien aldetik doako aparkaleku egokiak izatea askotan eskatu zaigu». Gainera, «tokiko merkataritzari bultzada bat emango genioke».
San Joan egunerako egingo dituzte asfaltatze lanak eta erabilgarri izango da. Ondoren etorriko dira argiztapenerako falta zaizkien lanak eta baita margotze lanak amaitzea ere. Parez pare duen aparkalekuko lanak iaz egin zituzten, eta Ibai Iriarteren hitzetan, antzeko itxura hartuko du aparkalekuak behin eraberrituta. Udalak 45.000 euroko aurrekontua du lan guztiak egiteko. Argiteriaren kasuan, udal langileen bidez egingo da, gastuak murriztea lortuz. Bestetik, herrigunean, seinaleak jarriko dituzte, Tolosara datorren jendeak non aparkatu jakin dezan.Trenbideak egiten duen muga psikologikoa apurtu nahi dute, San Estebanetik herrigunera oinez bost minutu baino ez daudela nabarmenduz. Herritarrei eta eskualdetik datozenei aparkalekua erabiltzeko deia egiten diete udaletik, Tolosan aparkatzeko lekua badela adieraziz.