Goizean Uemako batzarra egin eta gero, Uemako udaletako ordezkariez gain, beste udal batzuetako ordezkariak eta beste erakunde batzuetakoak batu ziren eguerdiko ekitaldi instituzionalean. Hala, Eusko Jaurlaritzatik Jokin Azkue Euskara Sustatzeko zuzendaria -eta Tolosako zinegotzia- etorri zen, Gipuzkoako Diputaziotik Martin Garitano ahaldun nagusia eta Zigor Etxeburua Euskara zuzendaria, Tolosako Udaletik Ibai Iriarte alkatea eta Inaki Irazabalbeitia zinegotzia eta gainera, Tolosaldeko hainbat udalerrietako udal ordezkari eta alkate. Besteak beste, Alegia, Orendain, Baliarrain, Leaburu-Txarama, Lizartza eta nola ez, Berastegiko alkateak. Izan ere, Berastegi larunbatean sartu zen ofizialki Ueman.
Udalerri euskaldunek adierazpen bat onartu zuten, eta kezka azaldu zuten euskara bizien dagoen lekuetan, arnasguneetan, ahuleziak agertu direlako. "Bilakera soziolinguistikoa mantenduz gero, euskara nagusi den udalerri gutxiago izango ditugu etorkizunean, eta hori bereziki kezkagarria da euskararen normalizazioa helburu dugunontzat".
Kezka eta aldarrientzako tartearekin batera, festarako tartea ere izan zen goizean, eta herritarrek zein agintariek gustura egin zuten dantza eguerdiko flashmobean.