Uzturre fundazioaren helburua gaurkotasuna duten gaien inguruko hausnarketa sustatzea da, eta hori izan zen, hain justu, atzoko hitzaldiaren xedea. Hitzaldia Tolosako Udaleko Olatz Peon (EAJ) zinegotziak aurkeztu zuen eta lehendakari ohiak 2005ean Madrilgo Kongresuan erabakitzeko eskubidearen alde egin zuen aldarrikapena ekarri zuen gogora.
Ibarretxek egungo egoera ulertzeko atzera begiratu behar dela esa zuen. Horregatik, foruen inguruko hausnarketa eginez eta iraganeko eta etorkizuneko itun ekonomikoak aztertuz hasi zuen hitzaldia.
Bestalde, etorkizuneko erronkak aztertu eta Europak bizi duen krisiaz ere hitz egin zuen. Europak ez duela proiektu bateraturik esan zuen, eta horregatik Europa birdefinitzea beharrezkoa da Ibarretxeren ustez. Europako batasun politikoa lortzeko eredu eta hitzarmen ekonomiko aldarrikatu zituen, "hori da behar den tresna juridiko-politikoa".
Ikusleek, besteak beste, Gure Esku Bidea giza kateari buruz galdetu zioten. "Orain ardura erakundeena da, eta euskal alderdien artean lehian aritu beharrean, elkarlanerako garaia da", esan zuen.