Tolosako dendetan erosiz, sari potoloak irabazteko aukera

Aurtengoan, San Joan jaien aurreko egunetara mugatu dute kanpaina, «kontsumoa festa egun horietan egiteko». Ekainaren 3tik 19ra izango da, eta 3.000 euro baino gehiago banatuko dute, erosketa nahiz kontsumo txekeetan. Batetik, 600 euroko hiru sari handi zozketatuko dituzte, eta bestetik, 25 euroko balioa izango duten 50 sari zozketatuko dira. Azken horiek 5 euroko txekeetan banatuko dira, eta ostalaritzako taberna, kafetegi eta jatetxeetan erabiltzeko baliatuko dira.
Zozketan parte hartu ahal izateko, bezeroak saltzaileak emango dion txartela bete beharko du, bere datuekin, eta postontzian sartu. Ekainaren 20an egingo dute zozketa, eta facebook-en eta Tolosa&Co-ren web orrian emango dituzte jakitera irabazleen izenak. 25 euroko saria irabazten dutenek San Joan jaiak egokitzen diren astean egingo beharko dituzte kontsumizioak.
Herria, girotuta
Bestalde, sariekin osaturiko kanpaina egitearekin batera, aurreko urteetan egin moduan, San Joan jaiak girotzeko merkatari eta ostalaritza elkartea osatzen duten bazkideek euren saltokiak apainduko dituzte. Batetik, arkuak banatuko dituzte, dendaren sarreran edo erakusleihoan jartzeko. Bestetik, lizarrak banatuko dituzte ekainaren 24an goizean goizetik jartzeko. «Egun handi horretan, Tolosa jantziz eta apainduz nahi dugu parte hartu», azaldu dute, herritarrak animatuz kalera irten eta saltokiak bisitatzera.