Proiektuari esker, zoru berria jartzearekin batera jolas toki guztia estali dute, 365 m2ko azalera duen estalpea jarri baita. Horrez gain, aurreikusirik ez zeuden mantenu lan nahiz hobekuntza batzuk egiteko ere aprobetxatu da, tarima edota bankuak barnizatzea, esaterako.
Lanen baitan, kontsumo gutxiko argiteria (LED) jarri dute estalpearen azpian, jokoak berritu dira, margotu eta apurtuta zeudenak konpondu egin dituzte.
Proiektuaren aurrekontua 110.000 eurokoa izan da. Gipuzkoako Foru Aldundiak tokiko ekonomiak dinamizatzeko eta tokiko inbertsioak bultzatzeko planaren barruan emandako diru laguntzari esker finantzatu da. Bi fasetan banatuta egin dituzte lanak. Inauterien aurretik estalpearen oinarriak jarri zituzten, eta jolasak konpondu. Ondoren, berriz, lurra aldatu eta estalpea jarri zuten.
Nabarmendu behar da, aldundiak sustatutako enplegu planaren bitartez, bost pertsona kontratatu dituztela, eta bide batez, udaleko langileen brigada indartu. Izan ere, beraiek arduratu dira jolas tokiko haur jolasak konpontzeaz eta zorua aldatzeaz. Honekin, bi helburu lortu direlarik: enplegua sortzea eta kostuak murriztea.
Duela bederatzi urte, 2005ean egin zen Amaiur jolas parkea eta egun hiriko erabilienetakoa da. Udaletik adierazi dutenez, 2014ko aurrekontuak osatzeko herritarrei egindako galdeketan, behin eta berriz errepikatzen zen eskarietako bat zen, jolastoki estaliak egokitzearena. Hori dela eta, Gipuzkoako Foru Aldundiak eskainitako laguntza proiektu horretara bideratzea erabaki du Udalak.