Euskal Autonomia Erkidegoko bosgarren BTT zentroa inauguratu dute Tolosako Usabal kiroldegian. Tolosaldean barrena mendi-bizikletaz egin ahal izateko ibilbideez osatutako maparekin batera, bizikletak garbitzeko guneak eta seinaleak jarri dituzte. Guztira, natura-turismoaren aldeko apustu bateratu baten alde. Igandean bertan BTT lasterketa izango da, Usabaletik abiatuta.
Inaugurazio ofizialean Tolosaldeko udaletako ordezkariez gain, Tolosaldea Garatzen agentziako arduradunak, bizikleta dendetako kideak eta turismoarekin zerikusia duen jendea elkartu da. Horiekin batera, Tolosako alkate Ibai Iriarte, Eusko Jaurlaritzako Basquetour turismo agentziako zuzendari Arantza Madariaga eta Gipuzkoako Foru Aldundiko turismo zuzendari Roke Akizu izan dira egitasmoaren xehetasunak azaltzen.
Kirola eta natura uztartzearekin batera, Tolosaldeari bultzada ekonomiko bat emateko bidea dela nabarmendu dute guztiek. Kanpotarrak eskualdera erakartzearekin batera, gainera, Ibai Iriartek Tolosaldea kohesionatzeko tresnatzat du BTT ibilbideen mapa: "28 herri gara Tolosaldean eta sarri geronek ere ez dugu eskualdea ezagutzen. Hau izan dadila eskualdea ezagutu eta herri guztiak kohesionatzeko tresna".
Ibilbideak askotarikoak dira, baita zailtasun mailari dagokionez ere, eta kolorren bitartez markatu dituzte horiek guztiak. Horrela, prestatu dituzten esku-orrietan San Blas (oso erraza), Zazpibideta (erraza), Leaburu (zaila), Uli (zaila), Belabieta (oso zaila), Leitzaran (oso zaila), Izaskun-Berastegi (oso zaila) eta Txindokiko itzala (oso zaila) ibilbideen inguruko xehetasunak ezagutzeko aukera izango dute interesa dutenek; ibilbidearen luzera, denbora eta deskribapenak daude bertan.
BTT ibilbideak egin nahi eta materialik ez duenak ere izango du bizikletan nahiz GPSak alokatzeko aukera. Halaber, bizikleten garbiguneak doakoak izango dira eta dutxa eta aldagelei dagokienez, berriz, harrera-puntuetan galdetu beharko da.
BTT proba
Igandean, BTT ibilbideen inaugurazioaren harira, Tolosako BTT proba egin zuten. Izen-ematea 08:00etan ireki zuten Usabalen eta 09:00etan hasiko zen lasterketa. Kontrol-guneak jarriko zituzten eta bi orduan ahalik eta kontrol-gune gehienetatik pasatu behar izan zituzten kirolariek.