Etxeratek espetxe politikak biktimak eragiten dituela nabarmendu zuen igandean, Tolosan egindako urteko batzarrean. Hamairugarren batzar orokorra izan zen eta aurten "gure senide presoei, sakabanaketa politika era sistematizatu eta orokorrean aplikatzen hasi zirenetik 25 urte igaro" direla esan zuten.
Era berean, sakabanaketak "apurtutako" 16 familiak ekarri zituzten gogora; "euren senide presoak bihotz-bihotzez laztantzeko hileroko aukera bakar horren bila, milaka kilometro bidaiatzen ari eta ezin itzuli geratu zirenez ari gara. Bikoitz apurtutako sendiak".
"Jasangaitza eta onartezina da, hemen batu garen senide eta lagunen sufrimenduaren gainetaik salbuespeneko neurriak aplikatzea. Noiz arte jarraituko duzue sufrimendu hau eragiten? Noren mesederako? Zein helbururekin?", galdetu zuten.
Espetxe politika honen biktima izateaz nahikoa dela esan, eta gaineratu zuten "ez dugu onartuko sufrimendu gehiago eragin dadin osatzen dugu familia handi honetan, ezta garaipen ez porrot politikoen ikurrik egin dadin ere, giza eskubideez ari garenean, pertsonez ari garenean".
Bukatzeko, aurten gauzak aldatuko direnaz ziur daudela esan zuten, "gure partetik ahal dena eta gehiago egiteko prest gaude honela izateko, sakabanaketarekin eta salbuespen neurriekin behingoz amaitzeko. Batzar honetatik, denon konpromisoaz lortzeko gai garenaz ziur ateratzen gara! Etxean nahi ditugu!".