Hirugarren fasean hiru bilketa sistemen arteko alderaketa egin dute, eta horren berri emateko batzar irekia egingo dute asteazkenean, hilak 12, 19:00etan, Topic-en.
Udalaren iritziz, ezinbestekoa da gaiaren inguruan herriarrak informatzea, eta horregatik gonbidatzen ditu tolosarrak batzarrean parte hartzera. Azalpenak alkateak berak eta Idema enpresako kideek emango dituzte.
Azterketak lau fase ditu; lehenengoan gaur egungo egoeraren diagnosia egin zuten, bigarrengoan bost bilketa sistema konporatau zituzten, eta hirugarrengo honetan hondakinen bilketa sistemarako jarraipen batzordeak aukeratutako hiru sistemak aztertu dituzte. Hau da, nahitaezko bost edukiontzietan oinarritutako sistema, bilketa sistema komunitarioa eta atez ateko sistema konparatu dituzte.
Bete beharreko helburuak
Sistema bat aukeratu edo bestea, honek zortzi puntu behar ditu:
1.- Ahalik eta gehien murriztea hiri hondakinak.
2.- Gaika ahalik eta hondakin gehien biltzea: ezartzen den momentuan %60-70, eta bi urteko epean kopuru hori %70-90ra iristea.
3.- Gaika biltzen dena kalitate onekoa izatea.
4.- Errefusa kopurua ahal bezain beste murriztea.
5.- Ereduak udalerriko auzoen izaera eta ezaugarriak kontuan hartu beharko ditu.
6.- Jasangarritasunari buruzko beste faktore batzuk kontuan hartzea, esaterako, bizitza-zikloa, edo CO2 isurketak.
7.- Gaikako bilketa herritar guztien ardura eta betebeharra izan behar du.
8.- Gaur egungo egoera, bilketa maila, azpiegiturak eta herritarren ohiturak kontuan hartzea.