Shanti Txapelketa, beste behin, «arrakastatsua»

Eguberrietako Shanti Txapelketa arrakastatsua izan da beste urte batez, eta antolatzaileak «oso pozik» azaldu dira. Ez da gutxiagorako, 32. urtea egin du aurten gaztetxoei zuzenduriko futbol txapelketak, 64 taldek hartu dute parte, eta orotara, 555 neska-mutilek.

Puntu negatiborik izan bada, guraso batzuen jarrera izan da; izan ere, sari banaketan antolatzaileek adierazi dutenaren arabera, kexak izan dira hainbat gurasoren partetik gaztetxo batzuek antza jolasterik izan ez dutelako «onenen mesedetan». Horrelakoek ez dutela zentzurik eta denen parte hartzea bultzatu behar dela azpimarratu dute antolatzaileek, datorren urteko txapelketan horrelako jarrerarik ez errepikatzeko eskatuz.

Txapelketari dagokionez, gaur, errege egunez, jokatu dira urtero bezala, finalak, Usabal kiroldegian. Bost mailatan banatu dute txapelketa, beraz, bost final izan ziren ikusgai. Hauek ikustera joandakoek erruz bete dituzte harmailak, eta giro oso polita izan da goiz osoan zehar.  

Partida gehienak orekatuak izan dira, eta emozio handia bizitu da epaileak azken txistua jo duen arte. Bi partidetan emozio hori areagotu da, gainera, penaltietan erabaki baitira. Bada, azken finala amaitzean sari banaketa egin dute, eta lehen hiru postuetan geratu diren taldeko kideei oparitxoak banatu dizkiete.

Emaitzak

Benjamin neskak 
Samaniego Izurdeak	2 
Laskorain Izurdeak	4

Benjamin mutilak
Uzturpe			2 
Lagun Onak*		2

Alebin neskak
Zurrunbiloak*		2
Aupa Hi			2 

Benjamin mutilak
Iurre taberna		7 
Casa Julian		2 

Alebin mutilak
Intxurre B		3 
Dream Team	1 

* Penaltietan irabazleak