Migrazioaren Nazioarteko Egunaren harira, integraziora iristeko hainbat urtetako egitasmo baten inguruko dokumentala ikusgai izango da, bihar, abenduak 19, Tolosan. 19:00etatik aurrera, Topic zentroko aretoan izango da hitzordua, Balta Txuria, Balta Berdea. Urumearen zurrumurrua filma ikusteko.
2012. urteko maiatzera atzera egin behar da ikus-entzunezko lan honen oinarrietara joateko. Astigarragako Udalak, jaurlaritzak eta aldundiak herriko ijito errumaniarren kanpalekua auzo moduan errekonozitu zuen, eta biztanle hauek integratzeko bost urtera begirako egitasmoa diseinatu zuten. Integrazio proiektu honetan aritzeko, ordea, Balta Txuria auzoko eta Balta Berdea auzoko herritar hauek hitzarmen bat sinatu zuten.
Kanpalekuko biztanleen iritziak, beste herritarrenak nahiz erakundeenak bildu dituzte zuzendariek, ordubeteko lanean.
Proiekzioaren ondoren solasaldia egingo dute, eta zuzendarietako bat den Anaitze Agirre, SOS Arrazakeriako Agustin Unzurrunzagak, Balta Berdeako bizilagun Maripiana Bartusek eta Mikel Goenaga Astigarragako apaizak parte hartuko dute saioan. Tolosaldea Garatzenek bertaratzeko deia egin die herritar guztiei.
