Hirukide ikastetxeko Kirikiño Aisialdi Taldeak ere gabonetako kanpaina solidarioa jarri du abian. Azken aste honetan Abegi, etxerik gabekoen laguntza zentroan, izan dira laguntzen eta bihar, elikagaiak eta osasun produktuak biltzen izango dira Tolosako supermerkatuetan elkarte berarentzat, baita Caritasentzat ere.
Guztira batxilergoko lehen mailako 24 gaztek parte hartu dute kanpaina honetan, bi begiraleren laguntzarekin. Beren esanetan, «horrelako kanpainarik gabe, Abegi bezalako zentroek oso zaila izango lukete bizirautea», izan ere, «urrutira joan gabe, Tolosan ere bada laguntza beharrean aurkitzen den jendea». Pertsona horiei laguntzeko bihar goizeko 10:00etatik 13:00etara izango dira supermerkatuen sarreretan, baina kanpaina hilaren 20ra arte luzatuko dute. Data horretara arte, ikastetxean ere uzteko aukera izango da.
Kanpaina prestatzen aritu diren gazteak izan ditugu Ataria irratian. Natalia begiraleak eta Ainhoa eta Mariak azaldu digute nola prestatu duten kanpaina.