“Bilerak, obrak, entseguak... mila bitxikeria egon dira horietan eta bestelako ikuspegi hori jasotzen saiatu naiz erreportajean”. Kilometroekin zerikusia izan duten ekitaldi guztietan izan da presente bideogile tolosarra eta jendeak, oro har, ondo hartu du kamara. “Hainbestetan ikusi naute ni neu, dekoratuaren parte ere izan naizela. Konfiantza giroa sortu da jendearen eta nire artean”.
Urtean zehar izan den giro ona da Pablo Dendaluzek nabarmendu duena. “Lan gogorra izan da Andoainen testigua jaso genuenetik egindakoa, saturazio uneak ere izan dira, baina beti gailendu da giro ona”. Larunbatean Leidorren eskainiko den dokumentalean hori islatzen saiatu dira.
Kontsumo propiorako balioko du prestatutako bideoak. Baina baliagarria izango zaie etorkizunean festa hau antolatzeko ardura dutenei: “lan honetan ikusten da gauzak nola planifikatu, antolatu, bideratu... Orioko ikastolakoei bideoa ikustea gomendatuko nieke”.
40 minutu irauten duen lana ikusteko aukera izango da larunbatean eguerdiko 12:00etan hasita. Bertaratzen direnei DVD bat emango zaie opari. “Urte guztiko 15 bideo biltzen dituen bilduma izango da, ekitaldiz ekitaldi urteari errepasoa ematen diona”, azaldu du Dendaluzek.
Sarrerak eskuragarri izango dira Orbela tabernan eta ikastolako idazkaritzan, helduentzako 3 eurotan eta umeentzako euro batean. “Bideo hau ikusteko aukera bakarrenetakoa izango da eta beraz, jendea animatu nahi dut bertara”.