Tolosa C.F. Eskubaloiak bere martxa onarekin jarraitzen du eta datorren astean partidu historikoa edukiko dute Kike Mujikaren mutilek. Bidasoa-Irun talde historikoaren aurka jokatuko dute Euskal Kopako final laurdenetako partidua urdiñek datorren ostegunean. Asobal ligako taldearen bisita gogo handiarekin hartu dute tolosarrek eta beste erronka baten aurrean daude oraingoan ere. Aurten nazional mailan estreinatu da Tolosako eskubaloi senior taldea eta ligan lan txukuna egiten ari dira. Irundarren aurkako partidua abenduaren 12an izango da, iluntzeko 20:00etan Usabal Polikiroldegian.