Zumaiako Jose Mari Aramendi gailentzea ahalbitu duena epaimahaiaren erabakia izan da. Goizeko 11:30ean Tolosako Trianguloa Plazan ezarritako karpan sukaldatutako babarrunen dastaketari ekin diote sei epaileek: Rodriguez, Zubelzu, Oiheneder, Fleschman, Ceberio eta Garcia. Tartean sukaldari ospetsu eta gastronomia kritikariak, eta baita Basque Culinary Center-eko ikasle Zubelzu, Tolosako Babarrunaren inguruko tesia egin duena ere.
Behin sari banaketa eginda, babarrun irabazlearen enkanteari ekin zaio. Zumaiako Jose Mari Aramendik ekoiztutako 3 babarrun kilo dira enkantean jarri direnak. Babarrun lakaria eskuratu nahiean Dastatu internet bidezko elikagaien salmentaz arduratzen diren enpresako arduradunak eta Tolosan ireki berri den Merka&To dendako arduradunak aritu dira. Azkenean 1.000 euroren truke Dastatuk eskuratu du. Ordaidutako 1.000 euro horiek Afrikako Elkartasun Taldearen alde jaso dira.
Tolosako Babarrunaren astearen ospakizunen baitan, gaurko goizean zehar hainbat ekitaldi ezberdin ere burutu dira. Tolosaldea Garatzeneko Migrazio eta Aniztasun sailak bultzatuta, eskualdean bizi diren jatorri ezberdineko pertsonek Tolosako babarrunak prestatzeko modu ugari daudela erakutsi dute. Adibide bat baino ez da Ghanako jatorriko Tolosaldeko biztanleek prestatutako babarrunak: koose eta yoke gari erara aurkeztu dituzte.
Gainera, Tolosako Babrrunaren Kofradiaren eskutik Tolosako Babarrunaz gozatzeko aukera eskaini diete plazan bilduriko herritarrei. Babarrun platerkada ugari banatu dituzte ospakizunari erreferentzia eginez: "Tolosako Babarrunaren Astea".
Ekoizleek jakitera eman bezala, 2013. urtea uzta aldetik urte oparoa izan da. Izan ere, erein diren 500 kg. haziek 25.000 kg. babarrun eman dute. Iazko urteko datuekin alderatuta, zifra positiboa nabarmendu beharra dago; 2012. urteak 10.000 kg. babarrun eskaz eman baitzituen.
San Frantzisko pasealekua eta Trianguloa Plaza azoka bihurtuta
Goiz osoan zehar jende andana bildu da Tolosako Trianguloa plazan eta San Frantzisko pasealekuan; zer jan, zer edan eta zer erosi izan da bertan. San Frantzisko pasealekuak Liburu Azoka hartu du bere gain. Azaroaren 24a bitartean euskal disko eta liburuak erosteko aukera izango du bertaratzen denak. Horrez gain, "Euskal emakume idazleak" erakusketa ere ikusgai dago San Frantzisko kalean kokaturiko postuetan.
Bestetik, Trianguloa Plazan babarrunaz gain bestelako produktuek ere hartu dute protagonismoa gaurkoan, artisautza azokaren baitan: gazta, ardoa, eztia, baratzeko fruituak, haragia... Baserritarrek ekoiztutako lehen mailako produktuak Tolosako herritarren eta bisitarien eskura.
Egitaraua
Azaroak 16, gaur
07:30. Tolosako Babarrunaren Ekoizleen Lehiaketaren hasiera Trianguloa plazan.
09:00-14:00. Azoka Berezia Trianguloa plazan.
10:00-14:30. Euskal Herriko V. Frisoi Txapelketa Ferialekuan.
10:30-15:30. Tolosako Babarrunaren bidaia: ereitetik platerara. Dastatzea, bisita gidatua, bazkaria...
11:30. Tolosako Babarrunaren Ekoizleen Lehiaketako epaimahaiak bere lanari ekingo dio Trianguloa plazan.
12:00. Tolosako Babarrunaren Kofradiaren eskutik Tolosako Babarruna jateko aukera Trianguloa plazan. Bertako babarruna beste lurraldeetako moduan prestatua dastatzeko aukera egongo da.
12:45. Mus Txapelketako sari banaketa.
13:00. Tolosako Babarrunaren Ekoizleen Lehiaketako sari banaketa Trianguloa plazan.
13:15. Babarrun irabazlearen enkantea Trianguloa plazan.
14:30. Tolosa&Co-ko taberna eta jatetxeetan babarrun jatea.
Arratsaldean. Tolosako kaleetan elektrotxaranga ibiliko da.
17:00. Giza probak Oria kalean. Berrobiko gizon taldea Ibarrako emakume taldearen aurka.
17:00-20:00. Animagic, puzgarriak eta jokoak Beotibarren.
Azaroak 17, bihar
08:00. XXVII. Tolosako Babarrunaren Lehiaketa Gastronomikoaren hasiera Trianguloan.
13:00. Tolosako Babarrunaren Lehiaketa Gastronomikoko epaimahaiak bere lanari ekingo dio Trianguloa plazan.
14:30. Herri bazkaria Zerkausian.
16:30. Tolosako Babarrunaren Lehiaketa Gastronomikoko sari banaketa Zerkausian.