Tolosako Udalak, azken osoko bilkuran hala onartu eta gero, zerga eta tasa gehienetan KPIaren araberako igoera ezarriko du, hau da, 0,5ekoa. Ondasun Higiezinen gaineko zergari dagokionez, iaz egin bezala, ohiko bizileku ez diren etxebizitzei errekargua jarriko die.
Azken neurri horrekin udalak lortu nahi duena da, ohiko bizileku ez diren etxebizitzak alokairuan merkaturatzea, erroldatu gabeko jendea erroldatzea, iruzur fiskala azaleratzea eta bide batez Tolosan benetan zenbat etxe huts dauden ezagutzea, ondoren zer nolako etxebizitza politika aurrera eraman behar den erabakitzeko.
Iaz, neurria oinarritzat hartuta, udalak azterketa bat egin zuen eta hiriaren argazki bat osatu. Hala, bildutako lehen datuen arabera, inor erroldatu gabeko 754 etxebizitza detektatu ziren. Hasierako datu bilketa egin ostean alegazioetarako epea ireki zen, eta errekargua aplikatzen zen lehen urtea zenez, salbuespen gehiago onartzea erabaki zen, eta azkenean, 547 etxebizitzei aplikatu zitzaien errekargua.
Bestalde, Tolosako Udalak esan duenez, «tasak zerbitzu baten truke kobratzen dira orokorrean, eta berez, zerbitzuaren kostua estali behar dute». Kasu batzuetan, ordea, tasa nagusiek ez dutela zerbitzuaren kostua estaltzen azaldu du, eta ondorioz, beste diru sarrera batzuk erabili behar izaten dira, hondakin tasen igoera, esaterako.