Ertzaintzak goizaldean jaso du abisua. Beotibar kaleko etxebizitza baten leihotik objektuak ari ziren botatzen. Gertaera argitzera polizia gerturatu denean, gizonezko bat ikusi dute alde egiten. Udaltzainek eta ertzainek Rondilla kale inguruan gizonezkoa geldiarazi eta eskuetan labana zeramala ikusi dute.
Aldi berean, Ertzaintzaren beste patruila bat Beotibar kaleko hirugarren zenbakian dagoen etxebizitzara gerturatu da eta indarkeria zantzuak zituen gorpu batekin egin du topo. Osasun arreta zerbitzuak gerturatu direnean, 68 urteko gizonezkoaren heriotza baieztatu dute.
Rondilla kalean identifikatutako 54 urteko gizonezkoa Tolosako komisaldegira eraman eta etxebizitzan topatu duten gizonezkoaren hilketarekin lotura duelakoan atxilotu dute.
Herrizaingo sailak jakinarazi duenez, une honetan gertakariak argitzeko ikerketa zabalik da.