Aurten lehenengoz izango dira, Tolosan, Energiari buruzko jardunaldiak. Energiaren Mahaiarekin elkarlanean antolatu ditu Tolosako Udalak, eta Alkateen Ituna izeneko egitasmoaren harira dator proiektua. Azaroaren 13tik 15era, horrela, hitzaldi labur eta tailerrek osatuko dute egitaraua.
2011n batu zen Tolosa Alkateen Itunera, eta besteak beste, CO2 isurketak %20an murriztea da jomugetako bat. Helburu horri begira, eta oro har herritar guztien eguneroko bizitzan energia aurrezteari begira, "gertuko jardunaldiak" izango direla nabarmendu du Hasier De los Rios zinegotziak: "Sarri energia eta halako kontuan urruneko zerbati bezala ikusten ditugu, baina oso ulerterrazak izango dira hitzaldiak; azken finean, ahalik eta jende gehienarengana iristea da gure helburua".
Moderatzaile lanetan ariko den Jokin Aldazabal irrati esatariak ere gauza bera nabarmendu du, eta hizlariei gaia 10 minutuan aurkezteko agindua eman die, dibulgaziozko hitzaldi hauei dinamismoa eta gaien zehaztasuna eskatzeko.
Hitzaldiez gain, ordea, Topic zentroan bertan, Tolosaldea Goi Lanbide Heziketa Institutuko ikasleek tailer praktikoak eskainiko dizkiete bertaratuei, etxeko tresnekin: "Aldaketa txikiak eginda fakturetan asko aurreztu daiteke, eta hori erakustiko diegu, normalean jendeak ez baitakizki halakoak", azaldu du Xabier Gartzia ikasleak.
Egitarau osoa ikusgai hemen: http://www.tolosaingurumena.net/almacen/Energia%20kartela.pdf
