Astelehena da XVII. Udako Argazki Lehiaketara argazkiak bidaltzeko azken eguna. Lehiaketan sartu nahi duten argazkiak thargazkiak@hitza.info helbide elektronikora bidali beharko dira hilaren 23a baino lehen.
Izen-abizenak, herria eta argazkiaren azalpena beharrezkoak izango dira. Asteazkenean, argitaratuko dira parte hartzaile guztien artetik aukeratutako zortzi argazki finalistak. Ezinezkoa izango da egunkarian guztiak argitaratu ahal izatea, baina argazki guztiak webgunean ikusteko aukera izango da, Argazki Lehiaketaren atalean. Zortzi finalisten arteko irabazlea, ordea, harpidedunen esku geratuko da.
Bozka gehien jasotzen dituzten lehen hiru argazkiek saria izango dute. Harpidedunek, bost egun izango dituzte argazki gustukoenari bozka eman ahal izateko. Eta bozka ematen duten harpidedunen artean ere Hitzako materiala zozkatuko da.
Lehen argazki sarituak Bermeoko Lurdeia landetxean asteburu osorako egonaldia irabaziko du. Bigarren saria, Tolosako Beti-Alai jatetxean, bi lagunentzako asteburuko otordua izango da, eta hirugarren argazki sarituak, Larraitzen dagoen Txindokiko Itzala abentura parkerako bi sarrera eskuratuko ditu.
Beraz, udako argazkiei azken errepasoa egiteko garaia iritsi da.