Aurrerantzean osasun txartela erakutsi beharko da botikan; «seguruagoa eta eraginkorragoa» da
Eusko Jaurlaritzako Osasun Sailak jakinarazi duenez, Tolosako herritarrek erabil dezakete dagoeneko errezeta elektronikoen sistema beren botikak erosterako orduan. Errezeta elektronikoen sistema norbere botikak eskuratzeko modu berria da, eta arduradunek diotenez, «seguruagoa eta eraginkorragoa da». Aipatzekoa da, gainera, laster desagertu egingo direla orain arte erabili izan diren paperezko errezetak; botikara joatean, beraz, osasun txartela erakutsi beharko da beti, behar diren medikamenduak jaso ahal izateko.
Osasun sailak, besteak beste, errezeta elektronikoari esker mediku eta farmazialariak errazago koordinatuko direla azpimarratu du, eta honez gain, gaixo kroniko eta akutuak, asistentzia maila guztietan, medikamentuak agintzeko prozesuan integratu ahal izango dira. Arriskuak gutxitzeko eta terapia beteko dutela bermatzeko balioko du honek.