Ibai Iriarte Tolosako alkatea, Oihane Zabaleta Urretxuko alkatea, Laura Gomez Berdintasuneko zuzendaria eta Igor Eguren Ordiziako alkatea.
Gipuzkoako Foru Aldundiak, Tolosako eta Ordiziako udalek eta Urola Garaiko Mankomunitateak lankidetza hitzarmenak sinatu dituzte, udal esparruan emakumeen eta gizonen arteko berdintasuna sustatzeko eta indarkeria matxistaren aurkako politikak indartzeko. Hitzarmen hauen bidez, Berdintasun Zuzendaritzak «gizarte guztiaren ongizaterako oinarri-oinarrizkoak diren zereginetan kalitatezko lanpostu publikoak sortzearen aldeko apustua» egiten du.
Lankidetza hitzarmen hauen bidez Foru Aldundiak 60.000 euroko diru laguntza emango du berdintasuneko hiru teknikari lanaldi erdiz kontratatzeko Tolosako eta Ordiziako udaletan eta Urola Garaiko mankomunitatean.
Laura Gomez Gipuzkoako Foru Aldundiko Berdintasuneko zuzendariak adierazi duenez, «helburua da lanpostu espezializatuak sortzea berdintasunaren eta indarkeria matxistaren aurkako borrokaren esparruan, lan baldintza egoki eta iraunkorretan». Gomezen ustez, «hainbeste alderdi dituen krisi egoera honetan, premiazkoa eta atzeraezina da pertsonen bizitzaren prekarizazioari aurre egiteko lan egiten duten politikak abian jartzea, emakumeei gogorrago erasaten baitie, eta pertsonen zaintzan oinarritutako beste eredu bat eraikitzen saiatzea». Berdintasun zuzendariak gaineratu duenez, «ia emakume guztiek hartu behar izaten dute beren gain bizitzeko ezinbestekoa den zaintza hori, eta gainera modu ikusezin eta prekarioan, eta hautua egiteko aukerarik gabe. Era berean, emakume guztiek indarkeria matxistarik gabe bizitzeko dugun eskubidean aurrera egiten jarraitzea lortu nahi dugu».
Gomezek hiru toki erakundeek bide horretan aurrera egiteko azaldu duten «konpromiso politikoaren garrantzia» azpimarratu du: «Apustu politiko hori gizartearen ongizaterako oinarrizko zerbitzu publikoetan murrizketa ikaragarriak dauden garai honetan, ur-lasterraren kontra igeri egitea bezala da. Beste plan bat dagoela frogatzen ari gara, eta krisi sistemiko honetatik gizarte eta genero desberdintasunak areagotzea legitimatu gabe ateratzeko betebehar etikoa dugu».
Zuzendariak gogorarazi duenez, hitzarmen horiek berdintasuneko eta indarkeria matxistaren aurkako arloak indartzeko asmoz Foru Aldundiak Gipuzkoako udal guztiei 2012an egindako proposamenaren emaitza dira. Akordioaren arabera, bi aldeak konpromisoa hartzen dute lanpostu horiek legealdian zehar finantzatzeko. Foru Aldundiaren diru laguntza % 100ekoa izango da aurten eta murriztuz joango da poliki-poliki; udalena, berriz, areagotuz joango da, eta, azkenean, kostu guztia beren gain hartu beharko dute. «Hau da, ziurtatu dugu lanpostuak ez direla desagertuko Foru Aldundiaren diru laguntza bukatu ondoren», zehaztu du Gomezek.
Kontratazioa diruz laguntzeko zenbait baldintza ezarri ditu Foru Aldundiak. Batetik, gutxienez egun erdiko beste kontratu bat egitea. Horrez gain, kontratuak zuzenekoa izan behar du eta ezingo da aholkularitza enpresa baten bidez egin. Kontratatutako pertsonak egiaztatu beharko du emakumeen eta gizonezkoen arteko berdintasunaren alorrean gutxienez 150 orduko prestakuntza espezializatua duela edo gutxienez 2 urteko lan esperientzia duela berdintasun teknikari gisa. Bestetik, lanpostuak administrazio publikoko A edo B sailkapen taldean egon beharko du, eta, azkenik, hirugarren hizkuntza eskakizuna, EGA edo baliokidea izatea.