Saltokiak egungo bezeroen ohitura berrietara egokitze aldera, eta komertzioak sustatu eta jakitera emateko modu ezberdinak ezagutzeko helburuarekin, merkatariei zuzendutako jardunaldi berezia antolatu du Tolosaldea Garatzenek datorren ostegunerako.
Bertan, egoera berri horretara moldatzeko web orrialde bat sortu eta on line zerbitzua eskaintzeaz hitz egingo da, baita horrek eman ditzakeen onura eta zailtasunen inguruan ere. Horretarako, Tolosako Super-Eko supermerkatuaren esperientzia hartuko dute oinarri moduan.
Hauek euren web orrialdea kudeatzen dute, eta supermerkatuko produktu guztiak saretik erosteko aukera eskaintzen dute, dendara gerturatu beharrik izan gabe. Neofis enpresak sortu zuen tresna hori, eta bertako adituak ere izango dira jardunaldian, gauzak nola egin azaltzeko.
Hitzordua ostegunean, hilak 9, izango da, Tolosaldea Garatzeneko Auditorioan, Lehiberri zentroan, 15:00etatik 16:00etara.
Izena emateko hiru modu daude: aduriz@tolosaldea.net helbide elektronikora idaztea; 943654501 (5 luzapena) telefonora deitzea; edo www.tolosaldeagaratzen.net webguneko formularioa betetzea.