Bihar, hilak 6, Ariketa Fisikoaren Nazioarteko Eguna izaki, Tolosako Belate medikuntza zentroaren gimnasioan doako pilates saioa egingo da. 11:00etan emango zaio hasiera ordubeteko iraupena izango duen saioari. Bizitza sedentarioari aurre egin eta osasuntsu mantentzen ikasteko izango da. Pilates saioa tolosar guztiei zuzendua dago, eta izena www.clinicadelaasuncion.com webgunean dagoen fitxa betez eman daiteke.
Ekimena Mikel Otxoa pilates irakasle eta fisioterapeutak zuzenduko du. Partaideen egoera fisikoa eta maila dena delakoa izan da ere, irakasleak pilates diziplinaren oinarriak azalduko ditu era errazean. Pilates errehabilitazio prozesuan egon edota lesioren bat jasan duten pertsonentzat gomendagarria da, baita ariketa fisiko prebentiboa egin nahi dutenentzat ere. Egunerokotasunean ariketa fisikoak duen garrantziaz kontzientziatu nahi dute.