Tolosako II. Trialsin proba hartu zuen herenegun Tolosak, Biketrial taldearen eskutik, eta Tolosako Udalaren laguntzarekin. Usabal kiroldegiaren aldamenean lekutu zen probak 55 parte hartzaile izan zituen, eta antolatzaileek balantze baikorra egin dute, «arrakastatsua» izan delako.
Tolosa Biketrial taldetik azaldu dutenez, «maila handia erakutsi dute parte hartzaileek, ikusmin handia piztu du eta jende asko etorri da ikustera». Pasa den urteko probarekin alderatuta, bazen berrikuntzarik aurtengoan, izan ere, biketrial egiteko pista handitu egin dute, eta antolatzaileek esan dutenez, kirolariek txalotu egin dute berrikuntza hori.
Emaitzei dagokionez, Irene Caminos tolosarrak ez zuen bere eguna izan etxean jokatutako proban, eta seigarren postuan amaitu zuen kadete-junior-senior mailan. Hala ere, Gipuzkoako txapela ziurtatua zuen Caminosek, aurreko probetan batutako puntuei esker. Maila horretan, David Martin izan zen irabazlea. Alebin mailan ere izan ziren tolosarrak. Oier Lakunza hirugarren izan zen eta Igor Irazu, berriz, laugarren. Unai Iraola da Tolosa Biketrial taldean entrenatze lanetan aritzen dena.
Bestalde, elite mailan munduko onenetakoak izan ziren parte hartzen herenegun Tolosan, eta Benito Ros izan zen irabazlea. Benjamin mailan, berriz, Josu Perezek irabazi zuen eta infantil mailari dagokionez, Alejandro Montalvok.