Gaur Uraren Nazioarteko Eguna dela eta, herritarrak sentsibilizatzeko jarduerak izango dira
Tolosako Ingurumen Zentroa eta Tolosako Udala elkarlanean aritu dira, Uraren Nazioarteko Eguna dela eta, gaur Tolosan izango diren jarduerak antolatzen. Besteak beste, «uraren kultura berri bat» sortzea da udalaren erronkarik handiena.
Urteroko moduan, uraren inguruko kontsumoaz eta honen zaintzaz herritarrak sentsibilizatzera begirakoak izango dira egitasmoak. Horregatik, tolosar guztientzat informazio puntu bat izango da, egun osoan zehar, Trianguloa plazan; dokumentazioa eskuragarri izango da bertan.
Bestetik, zurrusta-haustekoak edo perlizadoreak banatuko dituzte herritarren artean; etxeko iturrietan jartzeko tresna txikiak dira, eta ur kontsumoaren %50a aurreztea ahalbidetzen dute.
Azkenik, lehiaketa bat ere antolatuko dute, Uraren Nazioarteko Eguna medio; Badakizu zein urtetan izan ziren azken uholde handiak Tolosan? galdera erantzun beharko da, eta irabazleei sariak banatuko dizkiete.
Uraren hezkuntza
Uraren Nazioarteko Egunaren aurretik ere, Tolosako ikastetxeetan gaia jorratu dute neska-mutilek. Izan ere, lehen hezkuntzako 3. zikloan eta bigarren zikloko lehen mailan, ibaiaren inguruko unitate didaktikoa izan dute ikasgai.
Besteak beste, ibaiaren paisajea, historia, parametro fisiko eta kimikoak, fauna eta landaredia ezagutu ahal izan dituzte, bai gelan, eta baita gelatik kanpo ere, burutu dituzten ibilbide gidatuetan.