Osasun publikoa defendatzeko mobilizazioa 12:30ean hasiko da Trianguloa plazatik
Tolosaldea Osasun Publikoaren Alde (TOPA) koordinakundeak, beste mobilizazio bat antolatu du igande honetarako: marea zuriarekin bat egiteko deia zabaldu dute, horrela, Tolosaldean.
Tolosako Asuncion klinika publiko egiteko, nahiz Tolosako espezialitateen anbulatorioa lehengo jarduerara itzultzeko, sinadurak biltzen hasi ziren, eta orduz geroztik hamaika dira antolatu dituzten mobilizazioak; gaur egun, 18.917 herritarrek sinatu dute, eskualdean, TOPAren eskarien alde.
Horrela, bada, igandea 12:30ean elkartuko dira, Trianguloa plazan, marea zuriarekin bat egiteko, eta elkarretaratzea egingo dute, lehenik, Osasun publikoa ez da saltzen, defendatu egiten da lelopean.
Jarraian, martxa abiaraziko dute, Osasun zentruraino, eta bertan, sinbolikoki okupatuko dute eraikina
Beste hiriekin bat eginez
Otsailaren 17a, igandea, ez da mobilizazio eguna eskualdean soilik izango.
Herrialde Katalanetan, esaterako, Bartzelona eta Valentzia izango dira, osasun publikoaren aldeko aldarrikapen gune. Espainiako beste zenbait hiritan, berriz, aldarrikapen bertsuak egingo dituzte etzi, marea zuriarekin bate eginez.
Horrela, Madrilen, Malagan, Murtzian, Segovian, Toledon, Zaragozan, Cuencan eta Almansan izango dira protestak, besteak beste.