Leidor antzokian ikusi ahal izango da 20:30etik aurrera; ‘El hijo de la novia’ filmean oinarritu dira antzezlana idazteko
Tolosa Tolosako Leidor antzokian estreinaldi bat ikusi ahal izango da gaur, 20:30etik aurrera. Ados Teatro taldeak Emaztegaiaren semea lana taularatuko du datozen hilabeteetan eta Tolosa aukeratu dute lehen aldiz erakusteko. Fernando Castets eta Juan J. Campanellaren El Hijo de la Novia filmaren antzerkirako egokitzapena da, eta Asier Hormaza, Sara Cozar, Iñake Irastorza, Kandido Uranga eta Mikel Laskurain aktoreak dira Garbi Losadaren zuzendaritzapean ariko direnak. Emaztegaiaren semea komedia handi egiten duten istorio horietakoa dela diote egileek eta horren arrazoia hauxe dela: «Eszena gehienetan, elkarrizketa dramatikoen erdian, umorea azaltzen da». Gertakizun nagusi bi dira egitura tragikomikoaren oinarria, gurasoen ezkontza eta familiako jatetxe baten zorigaiztoko negozioa kate handi bati saldu beharra. Ikuslea barre algaratik negargurara eramaten duten pertsonaiak eta egoerak ditu ardatz, Emaztegaiaren semeak.