Tolosako Udaleko Bildu eta Aralarreko udal taldeek agerraldia egin dute, Espainiako bandera jartzeko aginduaren harira, eta eskaera horri erantzuteko bide judizialei ekin dietela azaldu dute: "Ikurrina bere nazio-bandera bakarra dela sentitzen duten udaleko gainerako alderdiekin, inposizioaren aurrean erantzun sendo eta bateratu bat prestatzen ari gara".
Bide beretik, aurrerantzean prozesu honetan ematen dituzten pausoak herritarrei helaraziko dizkietela nabarmendu dute, eta herritarrei ikurrinaren aldeko hautua egiteko, eta "horren alde lan egiteko" deia egin diete: "Etorkizuna eraikitzeko unea da, inoren inposiziorik gabe".