Mendi Tour Tolosa ekimena antolatu dute hilaren 6 eta 7rako, Leidor aretoan. Gasteizen egiten den Mendi Film Festival jaialdiko pelikula onenak ikusteko aukera izango da bi egun horietan. Javier Baraiazarra Mendi Film Festival-eko zuzendariak esan duenez, «azken bi urteetan mendiaren inguruan egin diren film onenak ikusi ahalko dira». Hain justu, mendiaren inguruko jaialdietan sariren bat jasotakoak dira guztiak.
Tolosako Udalak eta Tolosagasak babestu dute ekimena. Edurne Mendia Kultura zinegotziak Tolosak mendiarekiko duen lotura nabarmendu du eta horrelako filmak herrian ikusi ahal izatea «luxua» dela esan du. Aurrera begira, ekimena «egonkortzea eta hobetzea» espero duela esan du Mendiak. Tolosagasako ordezkariak, Alberto Gonzalezek, eskerrak eman ditu Tolosara horrelako egitaraua ekartzeagatik, eta ekimen hori aurrera begira Tolosagasaren «ardatz nagusietakoa» izango dela adierazi du.
Baraiazarrak Leidor aretoari loreak bota dizkio: «Nahiko genuke guk Gasteizen horrelako leku batean ematea Mendi Film Festival-a, horrelako pantaila eta proiektorearekin». Egitarauari dagokionez, guztira 10 pelikula emango dituzte. Asteartean, hilak 6, Arditan, Fly or die, Cold eta Transantartika 2011 izango dira ikusgai, azken hau Juan Vallejok aurkeztua. Asteazkenean, The hardest of the Alps, Wild water, Linea continua, The Swiss machine, Next time Inshallah eta Hastapenetara itzulera emango dira, azken hau Josu Bereziartua egileak aurkeztua. Hasiera batean Alex Txikon mendizaleak egon behar zuen asteazkeneko saioan, bere azken espedizoari buruz hitz egiteko, baina Karakorumen dago oraindik eta ez litzateke garaiz iritsiko emanaldira.
Film guztiak jatorrizko hizkuntzan emango dira, eta azpitituluak euskaraz izango dira. Sarrerak, eguneko, bost euro balio ditu. Salgai daude Tolosagasaren bulegoan eta Leidorko leihatilan.