Tolosako udal gobernuak Usabal kiroldegiko bazkide zerrenda 100 lagun berrirekin handitzea erabaki du, aho batez, Tolosa Lantzen-en bileran gaia aztertu eta gero. Erabakia justifikatzen duten arrazoi nagusiak aipatzerakoan, erabilpen neurketek egungo instalazioetan kopuru hori hartzeko arazorik ez dagoela erakusten dutela adierazi du udal gobernuak. Gainera, udalak «irtenbide bat eman nahi dio itxaron zerrendetan aspaldi honetan eman den blokeoari». Aldi berean, itxaron zerrenda horren gaurkotasuna aztertu nahi du udalak.
Erabakia hartzerakoan, udal gobernuak «oso kontuan» izan du Berazubiren birmoldaketa, «epe laburrera hasiko dena». Berritze horrek «zerbitzuen eskaintza zabaltzea ahalbideratuko du eta zerbitzu osagarriak eskainiko ditu». Edozein kasutan, udalak bazkide kopuru berri horren eraginaren jarraipena egingo du.