Asteazkenean hasi ziren Mikologia Jardunaldiak, eta bihar amaituko da. Gaur, Tolosaldeko ikastetxeetako DBH 1eko ikasleek irteera egingo dute perretxikoak biltzera. Horretarako, Kasino elkarteko zenbait bazkideren laguntza izango dute. Hauek biltzen dituzten perretxikoak, arratsaldean Aranzadikoek sailkatu egingo dituzte.
Bihar, Tolosaldeko eta Goierriko hainbat jatetxeetako sukaldariek pintxoak prestatuko dituzte, Trianguloa plazan. 12:00etatik aurrera izango da pintxoak dastatzeko aukera, eta osagai nagusiak onddoak eta perretxikoak izango dira. Euro baten truke txartela eskuratu beharko da, eta hamalau postu izango dira. Ikasleek bezperan bildutako perretxikoak ikusgai egongo dira.
Herenegun izan zen lehen ekitaldia Zerkausian. Bere habitatean inprobisatzen mikogastronomiako hitzaldia izan zen. Ruben Trincado eta Roberto Ruiz ziren izatekoak, baina azkenean, Iker Martinez, Ormaiztegiko Kuko jatetxekoa; Fronton jatetxeko sukaldari taldeko Sonia Tapia, eta beraiekin batera laguntzaile lanetan, Jose Boccardo sukaldari argentinarra izan ziren.
Atzokoan berriz, barrengorriak izan zituzten hizketa gai, Pedro Arrillagaren eskutik.