Mende laurdena beteko du, datorren urriaren 4an, ABEGIk. «Tolosan noraezean zebiltzan hainbat lagunen errealitatea ikusita» sortu zen erakundea.
Tolosako Udalak, elizak eta norbanakoek laguntza eskaini zuten garai hartan, gaur egun ere Agintari kaleko 7. zenbakian jarraitzen duen aterpea martxan jartzeko. Orduz gerozti, 10.000 lagun baino gehiagok hartu dute ostatu bertan.
Egoitzako arduradunek, bolondresen laguntza izaten dute, eta bertaratzen direnek «duintasunez» garbitzeko, afaltzeko, lo egiteko eta gosaltzeko aukera izaten dute.
Hau guztia, Foru Aldundiaren diru laguntzarekin eta hainbat enpresek emandako elikagaiei esker burutzen dute, eta gizarteratzera bideratutako pisu bat ere badute 3 lagunentzat, Tolosako erdigunean. Udalak utzitakoa da, eta Foru Aldundiaren laguntza jasotzen dute gastuetarako.