Zonaldeko merkataritza jarduera suspertzeko eta inguruari lehen zuen bizia emateko, Gernikako Arbolako inguruak eraberrituko dituzte datozen hilabeteotan.
Bertako bizilagunekin eta merkatariekin hitz egin eta akordio batera iritsi ondoren, Tolosako Udalak proiektu bat martxan jartzea erabaki du. «Inguruak lehen zuen xarma berreskuratzea» da helburuetako bat, lorategietatik «oinezko gutxi» igarotzen baitira. Horrekin batera, inguru horretako merkataritza suspertu nahi dute; hainbat ekintza burutuko dituzte horretarako.
Hiru hilabeterako lanak
Uztaila bukaeran hasita, langileek hiru hilabeteko epealdia izango dute gernikako Arbolako lanak amaitzeko. Proiektuaren ardura Olloquiegui hondeaketak enpresari esleitu diote, eta 393.603,63 euroko aurrekontua izango dute eraberritze lanetarako. Horrez gain, Eusko Jaurlaritzak merkataritza sustatzeko ematen dituen Merkagune izeneko diru laguntzak ere izango dira obrak egiteko.
Gernikako Arbolako ingurua suspertzeko bide honetan, argiteria hobetuko dute, inguruko espailoak zabalduko dituzte, aparkalekuen antolaketa aldatuko dute, lorategiak barnealdetik zeharkatzeko pasabideak eraikiko dituzte, eta lorategi hauetako loreak aldatuko dituzte. Era berean, saneamendua eta ur horniduraren sareak konpontzeko probestuko dituzte lanak.
Aipatzekoa da, birgaitze lan hauek irauten duten bitartean, inguruko trafikoa bideratzeko zenbait aldaketa egingo dituztela.