Tolosako Udalak «herritarren partaidetza eguneroko jardunean txertatu» nahi du. Parte-hartze eredu bat aurkitzea «erraza ez den arren», eta guztion itxaropen, nahi eta beharrei erantzutea ere «zaila» denez, udalak «herritarrak udaleko kudeaketan eragile gisa txertatzeko, eraginkorra den lan esparrua adostea beharrezkoa» dela dio.
Hau dela medio, parte-hartze eredu berri bat proposatzeko topaketa bat antolatu dute otsailerako. Bertan parte-hartzearen alde onak eta txarrak, lortu nahi den partaidetza mota, parte-hartzeari buruzko proposamenak eta berau antolatzeko kontuan hartu beharreko elementuak eta edukiak ere eztabaidagai izango dira.
Topaketan iritzia eman nahi duen tolosar orok Herri Partaidetzarako Departamentuarekin harremanetan jarri beharko du otsailaren 1a baino lehen, 943 69 75 21 telefono zenbakiaren bidez nahiz tolosa2015@tolosakoudala.net helbide elektronikora idatziz.