Tolosako Urdiña Txiki elkarteak IX. Xake Txapelketa Azkar-Azkarra antolatu du igande honetarako. Elkartean bertan izango da.
Izen-ematea doanekoa izango da eta egunean bertan egin ahal izango da 09:30etik aurrera. Federatutako eta ez federatutako pertsonek hartu ahal izango dute parte, adin mugarik gabe.
Urdiña Txikiko arduradunek argitu dutenez, txapelketa «xumea» izateko jaio zena indartuz joan da eta gaur egun xake denboraldiko «klasiko» bat izatera iritsi da.
Tolosaldeko jokalariek hartu ohi dute parte, baina aurreko urteetan Iruñeako jendea ere gerturatu da, «baita Belgika eta Afganistanetik ere! ea berriz ere ikusten ditugun», azaldu dute antolatzaileek.
Maila altua
Txapelketako jokalariek maila altua dutela ere badiote, eta beraz, umeentzat oso aberasgarria izan daitekeela argitu dute. Horrexegatik animatzen dituzte eskualdeko xake jokalari guztiak, ume nahiz helduak, txapelketara gerturatzera.